الرئيسية
من طرف ضياء الدين البري السبت أكتوبر 16, 2010 3:25 pmالسلام عليكم .. مجرد رأي
كلام من قلبي
فين الرحمه ياخلق اللـــه ..؟؟؟
.....
شجرة زيتون
فاقده خضارها
يابسه فروعها
واتفرّقوا باقي الأغصان
فجأه لقيتها
طالعه وحيده فْ ناحية جاري
واقفه شريده فْ وسط جداري
والدنيا بتسمعها تنادي
شيفاها بتمد أيادي
وتـْزعّـق بعلوْ الصوت
ليه يا سْيادي ..؟
شايفنّي وسايبنّـي أعاني
ولا سألين
وقلوبنا بيسكنها أنين
ليه ناسْينّـي
عايزنـّي أركب قطر الموت ..؟
كل الناس شايفينها تـْصرّخ
وعتابها في القلب يـْجرّح
سكاكينها بتقطـّع فيّا
ودموعها بتشعلل ناري
ليه سبتوني وحيده ياهوووه.؟
فين الرحمه ياخلق الله..؟
ليه الأقصي هناك سبتوه..؟
جوّا السجن يعيش مأساه
لما سمعت نداها جريت..
واتأملت ، فجأه لقيت
جت في عنيّا ، صوره عارفها
شوفت حبيبتي
هيّا بعينها
سر النبض الساري فْ قلبي
ومش هانساها
مهما يكون
مهما الدنيا لعبت بيّا
مهما الغوله طالت مني
مهما حاربني ، إنـْس وجنـّي
لأن انا عمري ، موهوب ليها
وقلبي ودمي ، راح يفديها
مرّه قالت لي..
عشان تعذرني ، إسمع منـّي
لمّا لقيت الغوله مـُصِرّه
تقضي علينا جرّه فْ جرّه
هربـْت وجيت ..
قولت أكيد ممكن تحموني
واللي فاضللي
نبضه وحيده
هيّا الباقيه
وعايشعه فْ جدري
وجايّـه السوسه
ناويه تخللي ، الروح تعاديه
متوصيّه تقضي عليـه
جايبه اخواتها ، تـنـْخـُرْ فيـه
وكلاب الغوله المسعوره
إتربت علي نحت فروعي
بتمزّع وبتاكل فيّـا
وبتنهش دايما في ضْـلوعي
خايفه لتطرح نبت جديد
يمد اْديـه
يمكن يقدر يوم ينجدني
ويواسي الدمع المحبوس
ويقدم لي
بواقي الميـّه
ويرجّع نـُصّي المقصوص
تزرّع فيّـا الروح من تاني
تهرب مني جروح زنـّانه
يطرح قلبي ، نبض جدودي
وينادي نبضاتي التايهه
تخـْضَرْ غيطاني
فْ قلب حدودي
أتجدد
وأكبّـر زرعي فْ أحضاني
وتـْرجـّع نبتات الخلد
وتْخضّر أوراقي الخايبه
الناشفه من مدّه وخايفه
الصابره علي ريقها المُـر
النايمه في قبور أنانه
ممدوده زي الأموات
وكل ما أملك..
هوّا الصبر..
وقلوب مشغوله
شايله همومي ، حاسّـه بحالي
دعواتها دايما جيّالي
أرواحها بتـْقوّي صمودي
ونـْفوس تانيه ، كتير نـَسْياني
قايمه ونايمه ، تزيد حرماني
دايما تبعد
وكتير بتهدد
تمحي كياني
والدنيا سكناها بجد
بتخرّب فيها الهفوات
نسّتها إيه معني المجد
نزعت منها أي صفات
نسيوا الإسم ، وفين عنواني
وكإني في الدنيا بليّـه
رامينـّي للغوله ضحيّـه
سايبنها بتخرّب فينا
بتدّهوس في قلوبنا بحرقه
بتبعزق أوصالنا وسارقه
أي دليل يمكن يدّينا
حق العوده فْ يوم لولادي
أي تاريخ يمكن يحمينا
يثبت إن القدس بلادي
وبـْتسقينا المر كاسات
والغربان عمـّاله تمـوّت
في العصافير الباقية تزقزق
بتواسي القدس المدبوح
والغوله مش ساءله فْ حد
بتقطـّع في جسدنا الطاهر
وحمامه ماسكه الأغصان
بتسبّح باسم الحنان
واللي جسدها ، كله جروح
بالدمع الساكن في عنيها
بتنادي الأقصي المجروح
واللي مسيرها
تطير في الجنه
بعد ماتشكي لْرب كريم
من أمتنا القاسيه عليها
سايبه الغوله تقسّم فينا
واللي يهاتي يقولوا هاتوه
بأمر الغوله أكيد ينْـفوه
طب ساعدونا فْ شيل الهم
طول العمر نضحّـي بهمّه
وقت الجد يهون الدم
إمته يا أمـّه ، هاتقفي بذمّه
علشان حق ولاد العم
مصر تحاول ، تبني الوحده
تحيي مباديء ، طالها الردّه
حاولي يا أمّـه ، تساعدي ولادها
دول حافظين الغوله وعيبها
حرب اكتوبر تشهد لينا
شوفوا الغوله ، بتحاذر منـّا
وقت الجد هانقطع ديلها
هانقصّر في الدنيا وجودها
نفسي يا أمّـه ، تكوني عافيّـه
إنتي فْ قلبي ، ونور في عنيّا
إحنا كسبنا إيه م الفرقه..؟
غير الصهد ونار الشِّـده
وانتي أمّـه بقالك مـُدّه
سايبه الغوله بتلبس توبنا
وسرقت منا تاج العزه
حاكمه حصارها
وشوفنا فْ غزه
بتموّت أطفالنا بْـلذه
وزايده فْ نارها
بالفسفور الأبيض قايده
تشوي جلودنا عشان تلذّد
وانتي يا أمـّه ، ساكته وبارده
شوفي الأرض الطاهره بتصرخ
طالبه النجده
ياللا يا أمـّه
شدّي الشـدّه
قبل الروح ماتروح وتْـلخلخ
كل جذور الأمّـه تبان
ويـْموت فينا ، مجد جدودنا
لمّـا بانوه ، وصُّـونا عليه
علشان نمحي مين يعاديه
رسموا حدودنا
جوّا قلوبنا
عارفين يامّـه كل حقوقنا
وبرضه سايبه الغوله تْـلبّخ.؟
طايحه فينا معاها الشله
بيساعدوها خايفين منها
بالأموال وبكل ماتملك
بالأسلحه وحمايه تصونها
وجوّا بلادهم برضه تعكعك
باين ماسكه عليهم ذِلـّه
ياتـْهم زَلّـه
بتمشّيهم بالفرقلّـه
وانتي يا أمّـه
ييجوا عليكي
ويمشوكي بكل مذلّـه
إيه العِـلّـه ..؟
داحنا اصحاب الدين والملّـه
وارجع اقولك
والله انا خايفه
لتكون ديـّـه
آخر ندهه
ويْـضيع كللـك
أصل انا شايفه
نجوم الليل هربت من همّك
وشمس نهاري
من طول ليلك
نسْـيت شكلي
وملامحي التايهه فْ وديانك
سابتني فْ ناري
رسمت لي في عيوني الضلمه
ونـْهايه للسكـّـه العاميه
واللي تـْوَصّـل
لطريق الموت
تعبنا ياناس من كتر الْ آآآه
شبعنا مرار والعقل اهو تاه
فين الرحمه ياخلق اللــه ..؟
.........
أشكركم
وللجميع تحياتي
